Rodolfo Llopisen direktiba ez zen ezinbesteko berrikuntzaren aldeko apustua egiten zuten belaunaldi berriak goititzearen aldekoa. Unibertsitateko mugimendua alderdiaren egituran sartu zen eta Andaluziako gazte militante talde batek beste aire bat eman zion estrategia sozialistari: Sevillako zirkulua zen. Alfonso Guerra eta Felipe Gonzalez abokatuak nabarmendu ziren. 1969ko uztailaren 14an egin zen Alderdiaren Batzorde Nazionalaren bilera Baionan. Bertan egindako esku-hartzeekin Felipe Gonzalezek alderdiko nagusien babesa lortu zuen. Aire berria zekarren, ongi prestatuta zegoen eta karisma nabarmena zuen. Eta, gainera, heziketa Espainian jaso zuen. Eduardo Lopez Albizuren ustez Andaluziako Federazioaren ordezkari gaztea itxaroten ari ziren gizona zen: "Espainiako errealitatea ezin hobeto aditzera ematen zuen doinuarekin egin genuen topo, eta xedea guk, Ramonek, Nicok eta nik neuk, erabiltzen genuen doinuarekin erabat lotuta zegoen".